Örvarpið opnar fyrir umsóknir 1. september

Örvarpið
 · 
Örvarpið 2016
 · 
Menningarefni

Örvarpið opnar fyrir umsóknir 1. september

Örvarpið
 · 
Örvarpið 2016
 · 
Menningarefni
Mynd með færslu
30.08.2016 - 11:45.Vefritstjórn.Örvarpið
Örvarpið, vettvangur örmynda á Íslandi, hefur aftur göngu sína haustið 2016. Þetta er fjórða tímabil Örvarpsins, það hýsir örmyndahátíð á vef RÚV, undir www.ruv.is/orvarpid, en einnig verður uppskeruhátíð Örvarpsins haldin á Stockfish film festival í vor. Auk þess verður boðið upp á master class námskeið í örmyndagerð, fyrirlestrar og kynningar á örmyndaforminu almennt.

„Örmyndahátíðin opnar á RÚV í haust, nánar tiltekið 1. september. Hægt er að senda inn mynd frá 1. september – 7. desember 2016,” segir Halldóra Rut, annar stofnandi Örvarpsins.  „Hátíðin virkar þannig að allir geta sent inn örmynd sína, í hvaða formi sem er, á www.ruv.is/orvarpid. Örmyndin getur verið tónlistarmyndband, tölvuteiknimynd, örleikverk, örsaga, heimildarörmynd, stuttmynd, ljóðlist, osfrv. Sérstök valnefnd kemur svo saman vikulega út haustið og velur eitt verk til sýningar á vefsvæði Örvarpsins. Valin verk verða í kjölfarið tekin til sýningar á Stockfish Film Festival vorið 2017.

Amma, sigurmynd Örvarpsins 2015, eftir Eyþór Jóvinsson.

Unga kynslóðin hvött til að taka þátt

Örvarpið stofnuðu þær stöllur Halldóra Rut og Harpa Fönn Sigurjónsdóttir fyrir fjórum árum síðan. „Við höfum verið að vinna saman í um 6 ára skeið núna, og vorum sjálfar að framleiða örmyndir – að fanga augnablikið og veiða hugmyndir og örsögur, en fundum svo að það var enginn vettvangur til að sýna myndirnar! Við ákváðum því bara að stofna okkar eiginn. Úr varð og tók RÚV vel í hugmyndina, og hefur verið okkar helstu bakhjarl síðustu tímabilin, ásamt Bíó Paradís.”

Örvarpið hvetur alla til að taka þátt, og sérstaklega ungu kynslóðina, en það er kjörinn vettvangur til að gera tilraunir með örmyndaformið, hvort sem um er að ræða tilraunakenndar stuttmyndir, vídeólist, hreyfimyndir, stutt-heimildarmyndir, tölvuteiknimyndir eða eitthvað allt annað – allt er leyfilegt. Eina skilyrðið er að myndin má ekki vera lengri en 5 mínútur.

„Við viljum einnig koma því áleiðis að vikurnar 3. til 10. nóvember og 10. til 17. nóvember verða sérstaklega tileinkaðar örmyndum unga fólksins (20 ára og yngri), og þá munu einungis þær myndir koma til greina sem örmynd vikunnar,“ segir Halldóra og bætir við að því fyrr sem myndin er send inn, því lengur er hún í pottinum og því meiri líkur á að hún verði valin til sýningar.

Lokað verður fyrir umsóknir 7. desember, og síðasta örmyndin birt 8. desember á vef Örvarpsins.